Prishtinë, 13 Dhjetor 2019
Për ditë e më tepër janë duke u rritur mundësitë e studentëve dhe kursantëve të tjerë të Kolegjit Tempulli për punë praktike në institucionet dhe kompanitë partnere vendore dhe ndërkombëtare. Me inicimin e profesorit të rregullt të Kolegjit Tempulli, Prof. Gjelosh Vataj u arrit Marrëveshja e bashkëpunimit afatgjatë me Korporatën Energjetike e Kosovës Sh.A. Bashkëpunimi do të bazohet në shfrytëzimin e eksperiencave reciproke shkencore dhe profesionale, për punë të përbashkët.
Përmes kësaj marrëveshje KEK sh.a. do të ofrojë resurset e veta intelektuale dhe infrastrukturore, laboratorët dhe makineritë tjera me qëllim të kryerjes të praktikës dhe hulumtimeve nga ana e kandidatëve dhe të studentëve të Kolegjit Tempulli. Me rastin e nënshkrimit të kësaj marrëveshje Kryeshefi ekzekutiv i KEK-ut z. Njazi Thaqi shprehu gatishmërinë e KEK-ut për bashkëpunim konkret me qëllimin që nga kjo marrëveshje përfituesit më të mëdhenjtë të janë të rinjtë të cilët janë duke ndjekur studimet dhe trajnimet e ndryshme në Kolegji Tempulli.