Romë, 30 Mars 2015
Qysh nga viti 2012 Tempulli ka filluar kontaktet me përfaqësuesit nga Universiteti Sapienza rreth mundësisë së fillimit të një bashkëpunimi në mes të dy institucioneve. Dhe si rezultat i këtyre kontakteve të vazhdueshme gjatë një vizite të zhvilluar në Romë përveç takimeve mjaft konstruktive z. Krasniqi nënshkroi edhe Memorandum bashkëpunimin me Prof. Luca Persia nga Universiteti Sapienza i Romës.
Pjesë e takimeve ishin edhe prof. Shkëlqim Zeqo nga Tempulli dhe profesorët Antonino Tripodi, Davide Shingo Usami nga Qendra Hulumtuese për Transport dhe Logjistikë – CTL.
Universiteti Sapienza është ndër Universitetet më të vjetra në botë, i themeluar qysh në vitin 1303. Për nga cilësia është i ranguar i pari në Itali dhe ndër më të mirët në Europë me gjithsej 11 Fakultet dhe Departamente Hulumtuese.
Qëllim kryesor i këtij Memorandumi është bashkëpunimi akademik, shkencor dhe hulumtues në mes të Qendrës Hulumtuese për Transport dhe Logjistikë nga Universiteti Sapienza dhe Kolegjit Tempulli.
Pikat kyçe të këtij bashkëpunimi përfshijnë: mundësinë e përkrahjes me literaturë profesionale për nevoja të studentëve të dy palëve, zhvillimin e projekteve të përbashkëta hulumtuese, përkrahjen dhe bashkëpunimin për organizim dhe mbajtje të konferencave, simpoziumeve dhe aktiviteteve të cilat lidhen me trafikun dhe shkencat teknike.
Vlen të theksohet mundësia e krijuar për studentët të vazhdojnë studimet pasdiplomike në Universitetin partner dhe vendosja e marrëdhënieve bilaterale për mundësi mobiliteti në aktivitetet akademike, shkencore dhe hulumtuese.