Prishtinë, 26 Maj 2016
Me qëllim të zgjerimit të bashkëpunimit profesional, i cili ndikon drejtpërdrejt në shtimin e mundësive të reja për studentët dhe stafin, përfaqësuesit e Kolegjit “Tempulli” kanë nënshkruar marrëveshje bashkëpunimi me Universitetin Aleksandër Moisiu Durrës.
Fushat kryesore të këtij bashkëpunimi përfshijnë: mobilitetin e stafit dhe të studentëve në mes të dy institucioneve, zhvillimin e projekteve të përbashkëta hulumtuese, përkrahjen dhe pjesëmarrjen në konferenca, simpoziume dhe takime akademike, mundësinë e përkrahjes me literaturë profesionale për nevoja të studentëve të dy institucioneve.
Marrëveshja në fjalë është nënshkruar nga Rektori i Universitetit “Aleksandër Moisiu” Durrës z. Mit’hat Mema dhe Drejtori i Kolegjit të Shkencave të Aplikuara Teknike “Tempulli” z. Muhamed Krasniqi.
Universiteti “Aleksandër Moisiu” Durrës është një institucion publik i arsimit të lartë i krijuar me Vendim të Këshillit të Ministrave të Republikës së Shqipërisë.